Kredi me 0 për qind interes për ish-qiramarrësit, 6 dokumentet për aplikimin në e-Albania
Ish-qiramarrësit e banesave ish-pronë private mund të aplikojnë për kredi me 0% interes. EKB ka publikuar dokumentet që duhen për përfitimin nga skema.
Ish-qiramarrësit në banesa që kanë qenë ish-pronë private mund të aplikojnë për kredi me interes 0%, ndërsa Enti Kombëtar i Banesave ka publikuar dokumentacionin që duhet të paraqitet për të përfituar nga skema.
Mbështetja realizohet përmes subvencionimit të interesave të kredisë nga Buxheti i Shtetit, duke bërë që familjet përfituese të mos paguajnë interesin e kredisë. Procedura bazohet në VKM nr. 456, datë 31 korrik 2025, ndërsa aplikimi kryhet online nëpërmjet platformës e-Albania.
Sipas informacionit të publikuar nga Enti Kombëtar i Banesave, një nga dokumentet bazë është vërtetimi për përfitimin e statusit “banor në ish-pronë private”, i miratuar me vendim të Këshillit Bashkiak përpara vitit 2006.
Aplikanti duhet të paraqesë gjithashtu dokumentacionin që provon marrëdhënien e qiramarrjes. Këtu mund të përfshihet kontrata e qiramarrjes, autorizimi ose vendimi i ish-Komitetit Ekzekutiv, akti i dorëzimit të banesës apo një dokument tjetër zyrtar nga ish-Komunale Banesa, që vërteton lidhjen mes banesës së kthyer pronarit dhe qiramarrësit. Dokumentet duhet të jenë origjinale ose të noterizuara.
Dokumenti i tretë lidhet me kthimin e pronës te pronari i ligjshëm. Për këtë qëllim kërkohet vendimi për kthimin e pronës, vendim gjykate, dokument nga ish-N.K. Banesa, certifikatë ose vërtetim pronësie apo urdhër ekzekutimi që dëshmon kthimin e pronës. Edhe këto dokumente duhet të paraqiten në origjinal ose të noterizuara.
Pjesë e dosjes është edhe vërtetimi negativ i pronësisë. Ky dokument duhet të vërtetojë se kryefamiljari dhe anëtarët e familjes, sipas certifikatës familjare të datës 1 dhjetor 1992, nuk kanë banesë të regjistruar ose në proces regjistrimi.
Një tjetër kusht lidhet me gjendjen ekonomike të familjes. Aplikantët duhet të sigurojnë vërtetim nga organet tatimore, sipas të cilit asnjë anëtar i familjes përfituese nuk është subjekt i TVSH-së si biznes i madh.
Dokumenti i gjashtë është certifikata e gjendjes familjare aktuale.
Pra, dokumentacioni që duhet të bashkëlidhet në aplikimin në e-Albania përfshin: vërtetimin e statusit të banorit në ish-pronë private; dokumentacionin e qiramarrjes; dokumentacionin për kthimin e pronës; vërtetimin negativ të pronësisë; vërtetimin nga organet tatimore dhe certifikatën familjare aktuale.
Skema e kredisë me 0% interes synon të mbështesë kategorinë e ish-qiramarrësve në ish-pronë private për zgjidhjen e nevojave të strehimit. Interesi subvencionohet nga Buxheti i Shtetit, ndërsa qytetarët që plotësojnë kriteret duhet të ndjekin procedurën e aplikimit elektronik në e-Albania dhe të bashkëlidhin dokumentacionin e kërkuar.
k.jpg)